Ош облустук ИИБден билдиришкендей, 10-августта аял денесине жаракат алып ооруканага кайрылган. Алдын ала маалыматтар боюнча, аны 48 жаштагы күйөөсү сабап салган.

Алгач маалымат Кара-Кулжа РИИБде катталып, андан соң окуя алардын аймагында болгондуктан, материалдар Өзгөн РИИБге өткөрүлүп берилген. Эркек милицияга жеткирилди. Аялга алган жаракаттарынын оордугун аныктоо үчүн соттук-медициндик экспертиза дайындалды. Анын жыйынтыгы менен чечим кабыл алынат.

Кыргызстанда үй-бүлөлүк зомбулук учурлары жылдан жылга өсүүдө. Өткөн жылы ИИМ дээрлик 20 миң мындай фактыны каттаган, бул 2024-жылга караганда 27,5 пайызга көп. Ал эми үстүбүздөгү жылдын алгачкы үч айында эле 6 миң 621 учур катталып, өткөн жылдын январь-март айларындагы көрсөткүчтөн 44 пайызга көп болгон.