Жаңы түзүлө турган Улуттук агенттик криптовалюта, санариптик активдер жана блокчейн технологиялары боюнча мамлекеттик саясатты жүргүзүп, тармакты жөнгө салуу менен алектенет.

Маалыматка ылайык, агенттикке виртуалдык активдерди лицензиялоо, реестрлерди жүргүзүү жана санариптик активдердин жүгүртүлүшүн көзөмөлдөө боюнча бир катар ыйгарым укуктар өткөрүлүп берилет. Агенттиктин жетекчисин өлкө президенти дайындайт.

Ошондой эле жаңы түзүмдүн кызматкерлери үчүн өзүнчө эмгек акы системасы жана социалдык кепилдиктер каралган.

Бийлик бул кадам виртуалдык активдер рыногун өнүктүрүүгө, мамлекеттик көзөмөлдү күчөтүүгө жана санариптик экономикадагы башкаруунун натыйжалуулугун жогорулатууга багытталганын белгиледи.

Жарлык менен агенттиктин кызматкерлеринин штаттык саны, эмгекке акы төлөө тутуму жана кызматкерлердин социалдык кепилдиктери да бекитилди. Алсак, жумуштун татаалдыгы жана өзгөчө маанилүүлүгү үчүн үстөк акылар, ден соолукту чыңдоочу төлөмдөр, он үчүнчү айлык, ошондой эле тамак-аш жана транспорт үчүн компенсациялар каралган.

Мындан тышкары, документ агенттиктеги бош административдик мамлекеттик кызмат орундарына кызматкерлерди өзгөчө тартипте — конкурс өткөрбөстөн дайындоо мүмкүнчүлүгүн карайт.

Министрлер кабинетине үч айлык мөөнөттө өзүнүн чечимдерин бул жарлыкка ылайык келтирүү жана каралган бардык чаралардын аткарылышын камсыз кылуу тапшырылды.